నిరసన పెద్ద నేరం

ఇప్పుడు నిరసన పెద్ద నేరం
ఇప్పుడు నిరసన ఓ నిషేధింపబడిన హక్కు
అధికారం కమ్ముకున్న కళ్లకు 
నిరసన ఓ జాతి విద్రోహ చర్య
నియంతలను గుర్తుకు తెస్తున్న ఏకపక్ష చర్యలు
నేలకు ఆమడ దూరంలో నాట్యం చేస్తున్న ధరలు
బడుగువాడి నడ్డి విరుస్తున్న విద్యుత్ ఛార్జీలు
వాస్తవానికి ప్రజల జీవనస్థితి వారికనవసరం
అందరూ తలొంచుకొని పెంచిన ఛార్జీలు కట్టాల్సిందే
ఎదురు తిరిగితే బుల్లెట్లతో ప్రాణభక్షన చేస్తున్న
ప్రజా రక్షకభటులు
ప్రజల నిరసన వాళ్ల దృష్టిలో రిగ్గింగ్ కంటే పెద్దనేరం
మనిషి మనిషిగా మసలడం కష్టం
లఠీలు, భాష్పవాయుగోళాలు, కాల్పులు
అధికార అత్యవసర ఆయుధాలు
స్త్రీల విషయంలో నాటి దుశ్శాసన పర్వాన్ని
రూపు గట్టిస్తున్న దృశ్యాలు
ఇక్కడ దృశ్యాన్ని నిరోధించడం నేరం
దృశ్యాలు ఫొటో తీయడం అంతకన్నా పెద్దనేరం
వారి బూటకపు విధానాల్ని గొప్పగా తెరకెక్కించడం తప్ప
ఏది చేసినా నేరం.. నేరం...

(బషీర్ బాగ్ కాల్పుల ఘటనతో) 

              - 30.07.2000.